عمان جو- فايز شبيكات الدعجه
  اتصل احد هواة الانتخابات وقال :-
تحياتي باشا.
اهلين.
انا عقله.
بعرف..آ يا عقله تفضل.
شلونك.
ما يغبى لونك، احكي يا عقله. مد وافلح.
اخبارك؟
اخباري منيحه يا عقله.
شو عامل هالايام؟
ولا شي يا عقله.
صوتك متغير. خير؟ . انشالله ما في شي؟.
لا ما فيه شي يا عقله.
انا قاصد الله وقاصدك يا قرابه.
هات لشوف يا عقله.
1- والله يا شعر شواربي بدي فزعتك، ناوي انزل للانتخابات.
2 - وانت اخ.
3- وصديق.
4- ورجل غانم.
5 - ومن الكبار.
6- واحنا لبعض.
6- وإلك كل الاحترام والتقدير.
7-  وأنا والله مقصر معك.
8 - واعذرني إني ما تواصلت معك من يوم الانتخابات الماضية.
9-  والله انشغلت. بس والله مو ناسيك.
10- طمني عن صحتك .
11- انت اخ عزيز.
12- ودايما عالبال... ما تتغدى عندي بكره؟.
13- كيف الاولاد انشالله كلكو بخير.
14-  انا مركن على الله عليك.
15- انت تمون على جماعتك.
16- جيرت الله تعطيني يوم أساويلك غدا.
  عفيه عليك وبعدين؟ كمل  كمان عمو يا عقله لحتى اجاوبك الجواب إلي يعجبك. كمل لشوف عموه كمل.
  هنا شعر عقله ان نبرتي ساخنه شوي وسأل:-
عطوفتك شو بدك احكي يا باشا؟
إحكي اي شي يا عقله.
بالنسبه لبياني الانتخابي يعني؟.
أوك عقله. ماشي.
صرت كاتب نصه.. كمن سطر عن مكافحة الفقر والبطالة... وشوي عن فلسطين والقدس والعدو
الصهيوني.. وكمان حب الوطن. والباقي لسه.
  كتبت يا عقله (لقد طوقتم عنقي. وكم وددت ان اصافحكم فردا فردا) .
لا نسيتها.
اكتبها يا عقله.
كتبت عن تمكين الشباب والمرأة  ونعمة الامن والاستقرار يا عقله؟.
لا والله ناوي اكتبهم يا عمي.
كتبت سيرتك الذاتيه يا عقله؟
ارتبك عقله وقال.. ها يا عمي. سيرتي الذاتيه؟
  نعم سيرتك الذاتيه. يا عقله... مش علشاني.. انا عارفك من يوم ولدتك امك، وابوك صاحبي وانا وياه طلاب صف.
  أنا اعرف ان عقله لن يتمكن من كتابة سطر واحد في سيرته الذاتية تصلح للانتخابات. عدا عن انه كحيان، ما معه حق باكيت دخان.
وعقله هذا  ليس له شوارب. فقلت له كيف انا شعر شواربك؟
قال. هاكيف لعاد.. ولو يا باشا، قصدي انك عزيز
وغالي.
ماشي يا عقله ماشي.
بارك الله فيك يا عمي.
إسمع يا عقله.. ابشر بالدعم... وبالنسبة للغدا تكرم ما رح افشلك... جايك بكره انشالله.
هيك عقله اكل هوا، قال:-
ايش يا عمي!؟ جاي بكره عالغدا!؟ ما سمعتك منيح ما فهمت عليك.. الخط يقطّع.. الارسال سيء.
ثم فصل..اختفى صوت عقله.
عقله صلاخي.