عمان جو- أنا أمل عايش خريجة العمل الإجتماعي من الجامعة الأردنية.
طول عمري بحكولي إني أسم على مسمى، بنثر الأمل في أي مكان بكون فيه، رغم إعاقتي الحركية، ورغم الصعوبات اللي واجهتها في كل سنوات الدراسة وخاصة في المدرسة، العثور على مدرسة مُهيئة، زيارة مكان بدون ما آكل هم الحركة فيه واذا كان مُجهز، نظرات الكثيرين لي في الثانوية وانه مستحيل ، كله كان حافز قوي يخليني أبحث عن النجاح وأصر على الوصول له، وبفضل الله نجحت بالثانوية بمعدل ٧٣ واليوم تخرجت كأخصائية إجتماعية من الجامعة الأم "الجامعة الأردنية"،وبتقدير جيد.

أنا مش بس خريجة، أنا بنت تعبت، وحاربت، وكملت رغم كل إشي.
في أيام حسّيت فيها إني رح أستسلم، في لحظات بكيت فيها من التعب، من الضغط، من الإحباط...
بس كنت أتذكر ليش بدي أكمل، وأرجع أوقف من أول وجديد.أنا مشيت بطريق مليان تحديات، ويمكن ما كان أسهل طريق،بس وصلت...
تخرجت وأنا مرفوعة الراس، لأني عارفة إني تعبت وتعبت كتير، بس ما استسلمت.
اليوم بحكيها بكل فخر:
أنا أمل، وحققت حلمي، رغم كل شيء."

اهدي نجاحي إلى أمي التي كانت ترافقني طيلة هذه السنوات، رفيقة الدرب، وإلى أبي الذي قدم لي كل شيء لأصل الى ما أنا عليه اليوم وإلى كل من كان معي ودعمني في هذه المسيرة.