عمان جو - علاء الذيب
اليوم بالمؤتمر الصحفي الي انعقد في المركز الوطني لإدارة الأزمات ، كانت الصورة أبلغ من أي كلام ، الدكتور محمد المومني ببدلته الرسمية ، وجنبه الناطقون باسم الجيش العميد مصطفى الحياري والأمن العام العقيد عامر السرطاوي لابسين الفوتيك ، مشهد بسيط، لكن بحكي قصة دولة كاملة ، قرار يدار بحكمة، وميدان محروس برجال.

الأردن اليوم بتعامل مع كل اللي بصير حويلانا بثبات ووعي، رغم كمية الصواريخ والمسيّرات والظروف الصعبة في الإقليم، البلد واقف، ومؤسساته شغالة ، الجيش بحمي، والأمن بسهر، والحكومة بتشتغل لحتى تضل الحياة ماشية بشكل طبيعي ..

الي بميز الأردن دايما هو رجاله ، هدوء، مسؤولية، وقوة بدون اي استعراض ، ناس بتعرف شو يعني وطن، وبتوقف عند واجبها بدون تردد ، من الميدان لأعلى مستوى بالقرار، الكل شغال لهدف واحد "حماية هـ البلد" .

رغم كل التحديات، لسه الحياة مستمرة، والأسواق مفتوحة، والناس بخير ، بس بنفس الوقت، المسؤولية علينا كلنا ، لازم نلتزم بالتعليمات، ونبعد عن أي خطر، ونوعي أولادنا، لأنه سلامتنا هي الأساس.

الأردن مش بس أرض… الأردن قصة رجال ..
بدلة وفوتيك… وهيبة ما بتنكسر